Глубокие мысли Страстной

Приближаются великие дни Страстной седмицы. Сорок дней мы постились, с Божией помощью старались очистить свою душу от страстей, чтобы всем сердцем пережить самые важные события человеческой истории – страдания, смерть и Воскресение Господа нашего Иисуса Христа. В последние дни Великого поста нужно максимально освободить время для богослужения. Ведь Церковь устами своих святых песнотворцев каждый день не только напоминает нам о Евангельских событиях, но и помогает понять, какое значение они имеют лично для каждого из нас. К сожалению, по немощи нашей, по рассеянности мы многое слушаем невнимательно, а что-то не слышим вовсе. Предлагаем ученикам нашей школы заранее прочесть некоторые тексты из Триоди Постной, чтобы потом с особой радостью услышать их в храме во время богослужения.

Лазарева суббота

«Уще́дрив Ма́рфины и Мари́ины сле́зы, отвали́ти ка́мень от гро́ба повеле́л еси́, Христе́ Бо́же, воскреси́л еси́ возгласи́в ме́ртваго, ми́ра Жизнода́вче, Собо́ю уверя́я воскресе́ние. Сла́ва си́ле Твое́й, Спа́се, сла́ва вла́сти Твое́й, сла́ва сло́вом вся Соста́вившему» (седален).

Вход Господень в Иерусалим

«Прииди́те и мы днесь, весь но́вый Изра́иль, я́же от язы́к Це́рковь, со проро́ком Заха́риею возопии́м: ра́дуйся зело́, дщи Сио́нова, пропове́дуй, дщи Иерусали́мова, я́ко се Царь твой гряде́т тебе́ кро́ток и спаса́яй, и все́дый на жребя́ о́сле, сы́на подъяре́мнича, пра́зднуй я́же дете́й, ве́тви рука́ми держа́щи похвали́: оса́нна в вы́шних, благослове́н Гряды́й Царь Изра́илев» (стихира на Господи воззвах).

Великий Понедельник

«Страсте́й Госпо́дних нача́тки, настоя́щий день светлоно́сит. Прииди́те у́бо празднолю́бцы, усря́щим пе́сньми: Созда́тель бо гряде́т Крест прия́ти, испыта́ния и ра́ны, Пила́том суди́мь. Те́мже и от раба́ уда́рен быв по главе́, вся терпи́т, да спасе́т челове́ка. Сего́ ра́ди возопии́м Ему́: Человеколю́бче Христе́ Бо́же, прегреше́ний да́руй оставле́ние, покланя́ющимся ве́рою пречи́стым страсте́м Твои́м» (седален).

Великий Вторник

«Что уныва́еши, душе́ моя́ окая́нная? Что мечта́еши безвре́менно попече́ния неполе́зная? Что упражня́ешися к мимотеку́щим? После́днейший час есть отсе́ле, и разлучи́тися и́мамы от су́щих зде. До́ндеже вре́мя и́маши, возни́кни зову́щи: согреши́х Ти, Спа́се мой, не посецы́ мене́ я́коже непло́дную смоко́вницу, но я́ко благоутро́бен, Го́споди, уще́дри со стра́хом зову́щую, да не пребу́дем вне черто́га Христо́ва» (икос).

Великая Среда

«Го́споди, я́же во мно́гия грехи́ впа́дшая жена́, Твое́ ощути́вшая Божество́, мироно́сицы взе́мши чин, рыда́ющи ми́ро Тебе́ пре́жде погребе́ния прино́сит: увы́ мне, глаго́лющи, я́ко нощь мне есть разжже́ние блуда́ невоздержа́нна, мра́чное же и безлу́нное раче́ние греха́. Приими́ моя́ исто́чники слез, и́же облака́ми производя́й мо́ря во́ду. Приклони́ся к мои́м воздыха́нием серде́чным, приклони́вый небеса́ неизрече́нным Твои́м истоща́нием, да облобыжу́ пречи́стеи Твои́ но́зе, и отру́ сия́ па́ки главы́ моея́ власы́, и́хже в раи́ Е́ва, по полу́дни, шу́мом у́ши огласи́вши, стра́хом скры́ся. Грехо́в мои́х мно́жества, и суде́б Твои́х бе́здны кто изсле́дит? Душеспа́сче Спа́се мой, да мя Твою́ рабу́ не пре́зриши, и́же безме́рную име́яй ми́лость» (стихира на стиховне).

Великий Четверг

«Езе́ра и исто́чники, и моря́ сотвори́вый, смире́нию нас наказу́я изря́дному, ле́нтием опоя́сався, ученико́в но́ги умы́, смиря́яся премно́жеством благоутро́бия, и возвыша́я нас от про́пастей зло́бы, Еди́н Человеколю́бец» (седален).

«Его́же пропове́да А́гнца Иса́иа, гряде́т на заколе́ние во́льное, и плещи́ дае́т на ра́ны, лани́ты на зауше́ния, лица́ же не отврати́ от срамоты́ заплева́ний, сме́ртию же безобра́зною осужда́ется. Вся Безгре́шный во́лею прие́млет, да всем да́рует из ме́ртвых воскресе́ние» (стихира на Господи воззвах).

Великая Пятница

«Днесь ви́сит на дре́ве, И́же на вода́х зе́млю пове́сивый, венце́м от те́рния облага́ется, И́же А́нгелов Царь; в ло́жную багряни́цу облача́ется, одева́яй не́бо о́блаки; зауше́ние прия́т, И́же во Иорда́не свободи́вый Ада́ма; гвоздьми́ пригвозди́ся Жени́х Церко́вный; копие́м прободе́ся Сын Де́вы. Покланя́емся страсте́м Твои́м, Христе́. Покланя́емся страсте́м Твои́м, Христе́. Покланя́емся страсте́м Твои́м, Христе́, покажи́ нам и сла́вное Твое́ Воскресе́ние» (15 антифон).

«Днесь зря́щи Тя Непоро́чная Де́ва, на Кресте́, Сло́ве, возвыша́ема, рыда́ющи ма́тернею утро́бою, уязвля́шеся се́рдцем го́рце, и стеня́щи боле́зненно из глубины́ души́, лице́ со власы́ терза́ющи. Те́мже и пе́рси бию́щи, взыва́ше жа́лостно: увы́ Мне, Боже́ственное Ча́до! Увы́ Мне, Све́те ми́ра! Что заше́л еси́ от о́чию Мое́ю, А́гнче Бо́жий? Те́мже во́инства безпло́тных, тре́петом содержи́ми бя́ху, глаго́люще: Непостижи́ме Го́споди, сла́ва Тебе́» (стихира на Господи воззвах).

«Тебе́ оде́ющагося све́том, я́ко ри́зою, снем Ио́сиф с дре́ва с Никоди́мом и, ви́дев ме́ртва на́га непогребе́на, благосе́рдный плач восприи́м, рыда́я, глаго́лаше: увы́ мне, Сладча́йший Иису́се! Его́же вма́ле со́лнце на Кресте́ ви́сима узре́вшее мра́ком облага́шеся, и земля́ стра́хом колеба́шеся, и раздира́шеся церко́вная заве́са, но се ны́не ви́жу Тя, мене́ ра́ди во́лею подъе́мша смерть. Ка́ко погребу́ Тя, Бо́же мой, или́ ка́кою плащани́цею обвию́? Ко́има ли рука́ма прикосну́ся нетле́нному Твоему́ Те́лу? Или́ ки́я пе́сни воспою́ Твоему́ исхо́ду, Ще́дре? Велича́ю Стра́сти Твоя́, песносло́влю и погребе́ние Твое́ со Воскресе́нием, зовы́й: Го́споди, сла́ва Тебе́» (стихира на стиховне).

Великая Суббота

«Днесь содержи́т гроб Содержа́щаго дла́нию тварь, покрыва́ет ка́мень Покры́вшаго доброде́телию небеса́, спит Живо́т и ад трепе́щет, и Ада́м от уз разреша́ется. Сла́ва Твоему́ смотре́нию, и́мже соверши́в все упокое́ние ве́чное, дарова́л еси́ нам, Бо́же, всесвято́е из ме́ртвых Твое́ Воскресе́ние» (стихира на хвалитех).

Подготовила Марина Шмелева

Поделиться в: